Në kuadër të projektit “MALLAKASTRA” Olive Oil Experience i financuar nga Agjencia Italiane për Bashkëpunim dhe Zhvillim (AICS), Qendra Youth Act realizoi aktivitetin me titull: “Trajnim mbi Brandin, Paketimin dhe Marketingun e produktit” në qytetin e Mallakastrës. Trajnimi kishte si qëllim fuqizimin e kapaciteteve të grave, të rinjve, prodhuesve të vegjël dhe aktorëve të turizmit, duke i pajisur ata me njohuri dhe aftësi praktike për të rritur vlerën e produkteve lokale përmes ndërtimit të markës, paketimit cilësor dhe komunikimit efektiv. Në fokus të workshop-it ishte vaji i ullirit Kalinjot, si një produkt me identitet të fortë territorial, i lidhur ngushtë me trashëgiminë kulturore dhe potencialin turistik të Mallakastrës. Gjatë aktivitetit, pjesëmarrësit u njohën me rëndësinë e brandit për produktet ushqimore dhe ndikimin e tij në rritjen e njohjes së produktit, besimit të konsumatorit dhe konkurrueshmërisë në treg.
Një pjesë e rëndësishme e trajnimit iu kushtua analizës së paketimit si një mjet komunikimi me konsumatorin, duke evidentuar rolin e dizajnit, informacionit dhe identitetit vizual në promovimin e produktit. Pjesëmarrësit punuan gjithashtu mbi konceptin e storytelling-ut, duke kuptuar se si historia e produktit ndikon në zgjedhjet e konsumatorëve dhe si kjo histori mund të përshtatet në mjete dhe platforma digjitale për promovim më efektiv.
